حلقے کے عوام چاہتے ہیں کہ کاچو امتیاز کو اسمبلی سے باہر کیا جائے۔ سید علی رضوی

گلگت ( ایم ڈبلیو ایم میڈیا سیل) حلقے کے عوام چاہتے ہیں کہ کاچو امتیاز کو اسمبلی سے باہر کیا جائے، عوام مطمئن رہیں کہ ان کے مفاد میں بہتر فیصلہ کرنے جارہے ہیں انشاء اللہ عوام سرخرو ہونگے۔
مجلس وحدت مسلمین گلگت بلتستان کے ڈپٹی سیکرٹری جنرل سید علی رضوی نے کہا ہے کہ ہم عوام سے وعدہ کرچکے ہیں کہ ان کے مفادات کا ہر سطح پر تحفظ کیا جائیگا۔مجلس کے ٹکٹ پر اسمبلی تک پہنچنے والے کاچو امتیاز حیدر خان نے آج کونسل الیکشن کیلئے اپنا ووٹ بیچا ہے توکل یہ پوری قوم کے مفادات کا سودا کرسکتا ہے اس لئے ایسے شخص کو اسمبلی سے باہر نکالنا ضروری ہے۔انہوں نے کہا کہ ہم اقتدار کی نہیں اقدار کی سیاست کرتے ہیں،اقتدار کو اقدار کے اوپر قربان کرنے میں کوئی ہچکچاہٹ محسوس نہیں کرینگے کیونکہ ہم عوام کے ساتھ وعدہ کرچکے ہیں کہ ہم ان کے مفادات کا ہر سطح پر تحفظ کو یقینی بنائینگے۔انہوں نے کہا کہ عوام مطمئن رہیں کہ ہم ان کے مفادمیں بہتر فیصلہ کرنے جارہے ہیں انشاء اللہ عوام سرخرو ہونگے،مجلس وحدت مسلمین عوامی مفادات کے تحفظ میں کسی سے کوئی سمجھوتہ نہیں کرے گی۔